მუსიკოსი მესაყვირე პაატა ბერიძე, რომელმაც აუგსბურგის ლეოპოლდ მოცარტის სახელობის უმაღლესი სასწავლებლის მაგისტრატურა დაასრულა, ამჟამად მუსიკალურ სკოლაში საყვირის პედაგოგად და ლითონის ჩასაბერ საკრავთა ანსამბლის დირიჟორად მუშაობს.
მისი გამოცდილება დაეხმარება გერმანიაში სწავლის მსურველთ, უკეთ გაიზრონ და ახლებურად დაგეგმონ მომავალი ....
DAAD-ის თბილისის საინფორმაციო ცენტრი მადლობას უხდის ბ-ნ პაატას გამოცდილების გაზიარებისა და ინტერვიუსთვის.
🔴 უნივერსიტეტში ადგილის მოსაპოვებლად, როგორც წესი, სააპლიკაციო დოკუმენტაციის გაგზავნაა სავალდებულო. რა დამატებითი მოთხოვნები აქვთ უმაღლეს სასწავლებლებს მუსიკოსების შემთხვევაში?
მუსიკოსებმა, პირველ რიგში, უნდა მოიძიონ ინფორმაცია პროფესორების შესახებ. მათ უნდა ნახონ, სად ასწავლის პროფესორი და რამდენად დატვირთულია ის. პედაგოგების ნაწილი თავად ეწევა აქტიურ საშემსრულებლო მოღვაწეობას (როგორც სოლისტი), შესაბამისად, მათი გრაფიკი მსოფლიო ტურნეებით არის გადატვირთული. ვფიქრობ, სტუდენტისთვის, განსაკუთრებით საბაკალავრო საფეხურზე, მსგავსი პედაგოგის ჯგუფში ყოფნა არც თუ ისე სახარბიელოა. ამ შემთხვევაში, სტუდენტის პედაგოგთან მუშაობის დრო შეზღუდულია და დავალებაზე დამოუკიდებელ მუშაობას უფრო გულისხმობს, რაც ხელოვანს განვითარებაში უშლის ხელს. გერმანიაში სწავლის გაგრძელების მსურველ მუსიკოსებს ვურჩევდი, მოიძიონ ისეთი პედაგოგები, რომელთაც სტუდენტებთან მუშაობისთვის შედარებით მეტი დრო აქვთ გამოყოფილი და მათთან თავიდანვე იქონიონ კონტაქტი - იქნება ეს მეილის საშუალებით, თუ ტურისტული ვიზიტის ფარგლებში პროფესორთან უშუალო შეხვედრის გზით.
სანამ გამოცდის ჩაბარებას შეუდგებოდეთ, პედაგოგმა თავად უნდა მოგისმინოთ და მის ჯგუფში სწავლის/ერთად მუშაობის შესაძლებლობები აწონ-დაწონოს. პედაგოგი იმავდროულად აფასებს, რამდენად სწრაფად და ეფექტიანად ძლევთ დავალებებს და თუ მოცემულ სემესტრში ვერ ახერხებთ მასთან მუშაობის დაწყებას, მისგან რეკომენდაციას ღებულობთ სამომავლოდ. პედაგოგებთან მჭიდრო ურთიერთობა აგვარებს რეპერტუართან დაკავშირებულ გაუგებრობებს და გვაძლევს შესაძლებლობას, დროულად გავერკვეთ ბევრ ტექნიკურ საკითხში. კარგი იქნება, თუ გექნებათ საშუალება და სხვადასხვა პედაგოგთან მოახერხებთ შეხვედრას, თუნდაც ამისთვის რამდენიმე ქალაქში ჩასვლა მოგიწიოთ. ამ სახით, უფრო მეტი არჩევანის საშუალება გექნებათ და უფრო მარტივად ჩამოყალიბდებით.
🔴 გერმანიის უნივერსიტეტში სწავლა ბევრი სტუდენტის სურვილია, თუმცა უმრავლესობამ არ იცის, როგორ მივიდეს მიზნამდე. რა არის, თქვენი აზრით, უმთავრესი, რაც მუსიკოსმა გერმანიაში სწავლისთვის უნდა გააკეთოს?
გერმანიაში სწავლის მსურველმა კარგად უნდა ისწავლოს გერმანული ენა. ბევრი ფიქრობს, რომ გერმანიაში ინგლისურითაც ადვილად გავა ფონს. ეს კი ასე არ გახლავთ. ლექციების უმრავლესობა მუსიკის სფეროში გერმანულად მიმდინარეობს. იმ შემთხვევაშიც კი, თუ გაგიმართლათ და უნივერსიტეტში სასწავლო კურსი ინგლისურ ენაზე იქნა შემოთავაზებული, ყოველდღიურობაში - მაღაზიაში, მეგობრებთან, სპორტ დარბაზებსა და თეატრებში - გერმანული ენა ბევრი სირთულის დაძლევაში დაგეხმარებათ. გერმანული ენის შესწავლისას თვითდისციპლინა და მტკიცე ნებისყოფა გმართებთ. გერმანული ენის სწავლა ყოველდღიურ რუტინად უნდა გაიხადოთ - მხოლოდ ასე მიაღწევთ მიზანს. გარდა ენის შესწავლისა, კარგი იქნება, თუ გერმანიაში წასვლამდე ამ ქვეყნის კულტურას და რეგიონალურ თავისებურებებაც გაეცნობით (ტრადიციები, სამზარეულო, რელიგიური შეხედულებები და ა.შ.). ეს მომავალში კიდევ უფრო გაგვიადვილებთ გერმანულ საზოგადოებაში ინტეგრირებას. კარგი იქნება, თუ ხშირად უყურებთ სახალისო გერმანულ ფილმებს და სერიალებს! ეს ენასთან დაგაახლოვებთ და მის გაგებას გაგიადვილებთ!
🔴 გერმანიის საუნივერსიტეტო სივრცეში, პროფესიული ურთიერთობების მხრივ, თუ არსებობს ნორმები, რომელთა დაცვაც მნიშვნელოვანია?
რათქმაუნდა, არსებობს. ხშირად, ჩვენთვის ბუნებრივად გულგრილი და არაპუნქტუალური დამოკიდებულებები „დედლაინთან“ დაკავშირებით რიგ პრობლემებს იწვევს. მათი არგათვალისიწნებით და მნიშვნელოვანი ინფორმაციის უგულებელყოფით, შესაძლოა მთელი წლის განმავლობაში მიღწეული შედეგები გავაუფასუროთ. მაგალითად, სემესტრული თანხის გადაუხდელობამ, შესაძლოა, გაუგებრობამდე მიგიყვანოთ, ბიბლიოთეკაში წიგნის დაგვიანებით ჩაბარებამ ჯარიმის გადახდამდე. ორივე მათგანს კი ჯაჭვური რეაქცია ექნება თქვენს სტუდენტურ ცხოვრებაზე. გერმანიაში მსგავსი გადაცდომები ადამიანს არასერიოზულ იმიჯს სძენს, რაც პიროვნების მიმართ ნდობას აქვეითებს და შემდგომ პროფესიულ კარიერაზეც უარყოფითად აისახება.
🔴 გერმანიის უმაღლეს სასწავლებელში ჩარიცხვის შემდეგ, რა სახის საორგანიზაციო საკითხები იწევს წინა პლანზე? რას ურჩევდით ამ მხრივ თქვენს მომავალ კოლეგებს?
გასათვალისწინებელია, რომ გერმანიაში ჩასვლისთანავე შეიძლება ყველა სტუდენტური საცხოვრებელი დაჯავშნილი დაგვხვდეს, რადგან საცხოვრებლის დაჯავშნას წინასწარ სჭირდება რეგისტრაცია. ეს მარტივი პრობლემა იქ ჩასულ სტუდენტს შეიძლება დიდ თავსატეხად ექცეს, დროის და ფინანსური რესურსის ზედმეტი ხარჯვა გამოიწვიოს. მნიშვნელოვანია ასევე საბუთების წესრიგში მოყვანა და კონკრეტული უნივერსიტეტის სასწავლო სისტემაში კარგად გარკვევა. ასევე, იმ უფლებების ცოდნა, რომელიც სტუდენტს ან კურსდამთავრებულს გვაქვს. იქნება ეს საკონცერტო დარბაზის დაჯავშნა თუ სტუდენტური დასაქმების გამოყენების უფლება.
ზოგადად, კარგი იქნება, თუ ჩაბარებისთანავე სტუდენტს მჭიდრო ურთიერთობა ექნება თანაკურსელებთან და კურსდამთავრებულებთან. მათთან კონტაქტი ახალბედებს ბევრი მნიშვნელოვანი საკითხის ადვილად მოგვარებაში ეხმარება. მათი გამოცდილების გაზიარება კი შეცდომების პრევენციის საუკეთესო გზაა.
ბოლოს კი, ყველას ვურჩევ წინასწარ დაგეგმოს სწავლის პროცესი გერმანიაში, რაც ერთი შეხედვით შესაძლოა მარტივი ჩანდეს, თუმცა სტრუქტურირებულ მიდგომას და მრავალმხრივი ინფორმაციის სწორ ანალიზს გულისხმობს.
ინტერვიუზე მუშაობდა: ნინო ანთაძე
ფოტო: ბექა ჯავახიშვილი
Mehr
German News Service
