🔴🔴🔴 სამომავლოდ ... სტუდენტებისთვის, რომლებიც ამჟამად აქტიურად ვერ ახორციელებენ თავიანთ გეგმებს.
ანა ჩახვაძე, თბილისის სახელმწიფო სამედიცინო უნივერსიტეტის მე-5 კურსის სტუდენტი, თავისი გამოცდილების შესახებ მოგვითრობს, რომელიც მან საზაფხულო ენის კურსის სტიპენდიის /Hochschulsommerkurse in Deutschland für ausländische Studierende und Graduierte ფარგლებში შეიძინა.
" მახსოვს, საზაფხულო ენის კურსის ბოლო დღეს პედაგოგებს ვუთხარი, რომ ეს ჩემი ცხოვრების ერთ-ერთი საუკეთესო ზაფხული იყო.
2019 წლის აგვისტოში DAAD-ის ერთთვიანი სტიპენდიის ფარგლებში დიუსელდორფში ვიმყოფებოდი. თავიდანვე ჩემთვის პრიორიტეტს სამედიცინო დარგობრივი ენის დაუფლება წარმოადგენდა, ამიტომაც არჩევანი Institute für Internationale Kommunikation Düsseldorf-ზე შევაჩერე, სადაც სამედიცინო ტერმინოლოგია გერმანულ ენაზე ავითვისე და გერმანული ჯანდაცვის სისტემასაც უფრო ახლოდან გავეცანი.
კურსის დასასრულს აღფრთოვანებული და ბედნიერი ვიყავი: პროფესიულ ცოდნასთან ერთად, პროგრამის ფარგლებში მრავალ გერმანულ ქალაქს ვესტუმრე და სხვა ქვეყნებშიც კი ვიმოგზაურე. თავგადასავლებითა და ნათელი ფერებით სავსე იყო ეს ყველაფერი.
ამ ერთი თვის განმავლობაში შევიძინე უამრავი ახალი მეგობარი და, შესაბამისად, მომავალი კოლეგა მსოფლიოს სხვადასხვა ქვეყნიდან. მთავარი კი ისაა, რომ გერმანული ენა ჩემთვის უფრო ავთენტური გახდა, კომუნიკაცია კი მეტად თავისუფალი.
გეცოდინებათ, რომ გერმანიაში სხვადასხვა სპეციალობების შესწავლა ინგლისურ ენაზეც არის შესაძლებელი (მედიცინა ამ მხრივ გამონაკლისს წარმოადგენს). თუმცა, გერმანიაში ყოველდღიური კომუნიკაციისა და სამსახურეობრივი თუ სოციალური კავშირებისთვის გერმანული ენის ცოდნა, უბრალოდ, აუცილებელია. რომ აღარაფერი ითქვას იმაზე, რომ გერმანული ენის დაუფლება ზრდის კარიერულ შანსებს - ეს მე საკუთარ მაგალითზეც გამოვცადე. მიუხედავად იმისა, რომ კარგად ვფლობ ინგლისურ ენას, გერმანულის ცოდნა ყველგან ძალიან დამეხმარა.
გულახდილად რომ ვთქვა, რეალობამ მოლოდინს გადააჭარბა — სამშობლოში დადებითი ემოციებით დამუხტული დავბრუნდი და ჩემს ბევრ ქართველ მეგობარსა თუ ახლობელს ვურჩიე, გამოეყენებინათ სტიპენდიის მიღების შანსი. მათ ჩემი რჩევა გაითვალისწინეს და ახლა ერთად ველით დაფინანსების პასუხს.
DAAD-თან ერთად გადადგმული პირველი ნაბიჯების წყალობით, გერმანიაში უკვე მეორედ გავდივარ კლინიკურ პრაქტიკას, ამჟამად კლინიკურ როტაციას ვაილჰაიმის კლინიკაში (ბავარია). ამ ხნის მანძილზე მიღებულ ცოდნასთან ერთად, ევროპაში პაციენტებსა და კოლეგებთან სწორი ურთიერთობის უნარი დავხვეწე, რაც კლინიკაში მუშაობისას ჩემს მთავარ ძლიერ მხარედ იქცა".
ფოტო: პირადი არქივიდან
ვრცლად
